Кху шеран  17-чу  августехь  Россин  Федерацин  Президент  Медведев  Дмитрий цхьаьнакхийтира  Нохчийн Республикан  Президентаца  Кадыров  Рамзанца. Цу шимма  дийцаре  дира  Нохчийчоьнан   социальни  дакъа а, юьртан   бахам   а   кхиоран,  республика   минех  цIанъяран   хьокъехь  долу   гIуллакхаш. Къаьсттина   тидам  тIебахийтира  минаш  дIаяхарца   йоьзначу  проблемашна.– Дукха  хан  йоццуш  суо  Нохчийн Республике   вар   дагалоьцу   ас. Суна   тайра  хIинца  Соьлжа-ГIалахь а, кхечу   меттигашкахь а  долу   сурт. Цо  гойту   республика  кхуьуш   хилар,  дуккха а гIуллакхаш   дина  хилар. Дера,  Iаламат   дукха   ма бу  бан  безаш   болу   болх а. Цундела,  Рамзан   Ахматович,  ас  дина   тIедахкарш   кхочушдарх  лаьцна   дуьйцур   ду  вай..., – бохура  къамелан  юьххехь   Россин  Президента.
Нохчийчоьнан  куьйгалхочо  мехкан  Президентана  дийцира  республика   кхиорехь  деш долу   гIуллакхех лаьцна: «Оха   коьрта  лору   социальни   дакъа  кхиор. Цу   декъехь  беш  дуккха а  белхаш   бу. Герггарчу   хенахь йина   ер  ю 600  дархочунна   цхьана   ханна дарбанаш   лелон  таро  лун  йолу   республикан   больница,  600  меттигна   лерина «Серноводск»  санатори. Кестта   схьайоьллур  ю  30 эзар   хьажархочунна  охьахха  меттиг   йолу   стадион  а,   спортан  комплекс  а... Дешаран   декъехь   кху шарахь  йина   ер ю  9836 меттигна   лерина   дешаран  заведенеш. Юьртан  бахаман   сурсатех  гIуллакх  даран   консервийн  шиъ  а,  шекаран цхьаъ  а  заводаш  ю еш.
Соьлжа-ГIалахь  кхеташо  дIахьочу  хенахь  вай   юкъадаьккхира   минаш   дIаяхаран   гIуллакх. Таханлерчу дийнахь а билгалбаккха а  бу   оцу  декъехь   дIабахьа   безачу   белхашна   финансировани   яран   барам... делахь а  хьан   тIедиллар тидамера   ца даьлла», – бохура  Р.Кадыровс.
Россин  Президента  Д.Медведевс  билгалдаьккхира  минаш  дIаяхаран   хьокъехь   долу   къамел а, гIуллакхаш  а чекхдаха   дезаш  хилар,  оборонан  министерствона  а, МЧС-на а,  кхечу   ведомствошна а  ша   кхин   цкьа  а  хьокъала   доллу   тIедахкарш дийриг   хилар.
Нохчийчоьнан   куьйгалхочо   минийн   проблемех  дуьйцучу   хенахь   хьахийра   Соьлжа-ГIала цIанъеш,  куьце   ялош   белхи   дIахьочу  хенахь снарядаш,  минаш,  лелхаш   болу   кхин   гIирсаш карийна   хилар а,  ларамаза   царна   тIенисвелла  ши стаг   кхелхина   хилар  а. Оцо   гойту  ур-аттал  Соьлжа-ГIала а   минех   цIанйина  цахилар,  кхийолу   гIаланаш а, ярташ а хьехочохь   а дац.
Шина   президента юха а   йийцира юьртан  бахам   кхиорехь   йолу   проблемаш. Кадыров  Рамзана   чIагIдарехь   царах  ю керла   техника  эца  а,  мелиораци ян   а таронаш   цахилар. «Хьалха   144  эзар гектар   майданашка   хи дара  дуьллуш. Тахана   иза   дуьллуш  дац. И гIуллакх  меттахIотторна   федеральни   Iалашонан  программица   билгалдинарг  800  миллион сом бен   дац. Ткъа  иза  оьшучуьнга   хьаьжча  вуно   кIезиг   ду.  Хидиллар   меттахIоттийча иттаннаш  эзарнаш  белхан  меттигаш  кхолла  аьтто  хир бара», – бохура   республикан  куьйгалхочо.
Цу тайпана   вовшех  дика   кхеташ,  вовшийн  боккха   сий-ларам   беш   дIадахара   цхьаьнакхетар. Вай   тешна   ду   цуьнан   тIаьхье   вайн  халкъана а,  Нохчийчоьнна а беркате   хирг  хиларх.  

С.-Хь.ДАДАЕВ.

{mosloadposition user9}


При копировании материалов ссылка на сайт обязательна

test 2Новости СМИ2