Нохчийчоьнан бусалбанийн  динан  урхаллехь  дIадаьхьира  керла зорбатоьхна  Сийлахь Къуръан довзийтар. Цигахь  дакъалоцуш  вара  Нохчийн Республикан   Iеламнехан   кхеташонан  куьйгалхо Кадыров  Хожа-Ахьмад-Хьаьжа,  дуьненахь вевзаш  волу   Iалим  Мухьаммад Садикъ  Мухьаммад   Юсуф (Ташкентерчу  исламан   институтехь Кадыров   Ахьмад-Хьаьжин хьехархо  хилла  волу),  республикан бусалбанийн  динан урхаллин   куьйгалхо,  муфти Мирзаев  Султан-Хьаьжа,  Россин   Федеральни   Собранин  Федерацин  Советов   сенатор  Сабсаби  Зияд,  ткъа иштта «Исламехь  суфизман  меттиг а, маьIна а» аьлла  йолчу  дуьненаюкъарчу  конференцехь  дакъалаца баьхкина  хилла  дуккха а  хьеший.Кхузахь  довзуьйтуш   хилла  Сийлахь  Къуръан дукха  хан  йоццуш  зорбатоьхна  Шемарчу   Дамаск гIалахь,  шен юкъара   тираж  20 эзар   экземпляр  йолуш. Иза  арахецарна   оьшу   харжаш   йира   Россин  Турпалхочун   Кадыров  Ахьмад-Хьаьжин   цIарах  йолчу  регионан  юкъараллин   фондо.
Къуръан   довзийтар  дIадоладелира   дуьненахь  уггаре къона   волчу,  Дамаск гIалин   маьждиган   бархI шо  кхаьчначу  имама,  хьафиза Зия Хьасиба  Къуръана   тIера   аяташ  дагахь   дешарца.
Цул  тIаьхьа   къамел  динчу  Кадыров Хожа-Ахьмад-Хьаьжас  дийцира   советийн   Iедалан заманахь дин  лелочарна  тIехь   латтош   хиллачу  къизаллех а, Iазапех а   лаьцна. Чохь  Къуръан   карийча  а луьра   таIзар  дора   кертан дена   бохура цо. Хожа-Ахьмад-Хьаьжас дийцарехь, Сийлахь  Къуръан  арахецар а, иза   дIасадаржадар а Дела  резахинволу   гIуллакх ду. Цо  таро  лур ю Нохчийчохь  бусалбадин  чагIдан. Iеламнехан   кхетошонан   куьйгалхочо   республикан   Президентана баркалла   элира  бусалбанашна   иштта    комаьрша   совгIат дарна.
« Нохчийн халкъан  оьмарехь дуьххьара    хилла   мехала   хилам   бу хIара, – бохура Сабсаби   Зияда. – Къилбаседа Кавказерчу   бусалбанаша  Iаьрбийн   мехкийн   векалшка дуккхазза  а дехарш динера   шайна   Делан   Калам   арахоьцуш   гIодахьара  аьлла. Иза доьзна дара  хьуьжаршкахь, дешаран  кхечу   кхерчашкахь  Къуръанаш  тоьаш   цахиларца. ГIуллакх  халчу   доккхура   Россин   МИД-н цу  тайпана   дехар    официале   дан   аьтто   цахиларо.
ХIунда аьлча, пачахьалкхо  динан  гIуллакхаш   цалеладо. Цуьнца   доьзна   Нохчийн  Республикан  Президента  Кадыров  Рамзана  шегара   сацам  бира,  шен   ден  Ахьмад-Хьаьжин   сийнна,  Шемахь   Къуръан  зорбатохийта». –  Цо  чIагIдарехь  кхул хьалха   Россехь   1908-чу  шарахь   бен арахецийтина  дац  Сийлахь  Калам. ХIетахь иза  Казанехь  зорбатоьхна  хилла.
Шен къамелехь   Мухьаммад Садикъ  Мухьаммад Юсуфа  билгалдаьккхира бусалба стагана    Везахинволчун  дош   дIасадаржадарал деза  хIума цахилар. Цо  Нохчийчоьнан  берриге  бусалбанаш  декъалбира  оцу   мехалчу   хиламца.
Нохчийчоьнна  лерина  Шемахь  Къуръан   арахеца  лицензи елла  Кадыров  Ахьмад-Хьаьжин   цIарах йолчу   регионан  юкъараллин   фондана. Цигахь   зорба а  тоьхна   схьадеана   долу  Къуръанаш  дIасадоькъур ду  вайн  республикан  а, ткъа иштта   Къилбаседа Кавказан   регионашкарчу  бусалба  дин   Iаморан   учрежденешкахь.  Мирзаев Султана   чIагIдарехь, оьшуш   хьал   хилахь  тираж  кхин а   алсамъяккха   таро ю.

С.ДАДАЕВ.     

{mosloadposition user9}


При копировании материалов ссылка на сайт обязательна

test 2Новости СМИ2