Премьер-лигин командашна   юккъехь  Россехь  хьалхеяккхаран   чемпионатан  21-чу   туран   матчехь  Соьлжа-ГIалара   «Терек» шен  цIахь  С.Билимхановн  цIарах   йолчу   стадионехь   цхьаьнакхийтира  Санкт-Петербургерчу «Зенит» командица. Масех  де  хьалха   Лига  Европы   олучу   къийсадаларшкахь   Санкт-Петербургерчу  «Зенит»  командо   хьошалгIахь  Бельгин   тоьллачех  йолу клуб «Андермент»  эшийра  3:1 жам1 долуш. Оцу   матчехь   кхоъ  буьрка  тохарца   билгалвелира  Кержаков Александр. Цул сов   2010-чу  шеран   мехкан  чемпионатехь  цхьаммо а эшийна   а  яц «Зенит». И  бахьана   долуш   нохчийн  болельщикийн   дагахь  жимма   кхерам   лаьттара. Амма  бакъду, Соьлжа-ГIалара  «Терек»  шен  цIахь  С.Билимхановн   цIарах  йолчу   стадионехь  эшна   яц,  ткъа   цуьнан   ойла   йича   мелла   а   сапаргIат   бовлура.Хууш ма-хиллара,  Соьлжа-ГIалара  «Терекан»  Санкт-Петербургерчу  «Зенит»  командица   хуьлуш  долу  цхьаьнакхетарш   атта   дицлуш   ца хуьлу. ХIунда аьлча, даима   дуккха а  хазачу  тIелатаршца   матч  нисло   дела. Бакъду,  счет   схьа   ца   йоьллуш   а нислора.
ДIадаханчу  шарахь   оцу   командашна   юккъехь   хилла   матч   цкъа а  болельщикашна   йицлур   яц   аьлла  хета   суна. Ши  буьрка  а тоьхна,   толам   баккха герга   болчу   соьлжагIалахоша  нийсса  шина   минотехь   счет   «Зенитан»   футболисташка  дIа а  нисъяйтина, матч   чекхъяла   масех  минот   йисинчу  хенахь,   гол а   тоьхна,   толам   баккхар. Кху  шарахь   Петровски олучу   стадионехь  хилла   матч  а  яра   ишттачех. Вовшашна   мел   кIезиг   шишша –кхоккха   буьрка   тоха   герга   бара   футболисташ, амма   вратараш  дика   ловзура. Оцу  цхьаьнакхетарехь   хIинца   Москва   гIаларчу   «Спартакехь»   волчу  Дикань Андрейс  Дани  Мигелера   тоьхна пенальти а   лецира.
Россин командаш   Европан   къийсадаларшкахь   дакъалоцуш   хиларна   жимма   садаIийтархьама  цхьайолу   матчаш   оршот  дийнахь   левзира. Цу  дийнахь   левзира   вайн  республикан коьрта   команда а, Россин тоьллачех   йолу   команда  «Зенит»  
Матч   дIайолалушшехь  «Тереко»  дIахаийтира  хьешашна  шаьш   хьошалла  дийриг   цахилар. ТIелатаршкахь   йолаелира   матч. Шайн   майдана  айъина   йохьуш   йолу   буьрка   схьалаца   тIеведдачу  Россин   вовшахтоьхначу   командин   декъашхо   волчу  Малафеев Вячеслава шен   ков   деса   дитира, цо  даьккхина  долчу   гIалатах   пайда   ца  ийцира   Маурисио  Жозес. Цо  тоьхна  буьрка   десачу   кевнна дикка тIехула    яхара. Кхин   дукха   хан   ялале   оццу  Жозен   аьтто  бара   счет   схьаелла,  амма гIуллакх  ца хилира. Ша  даима   ма-хиллара гол  тоха   карзахе   вара   вайн   командин   тIелатархо   Асильдаров  Шемал, амма  цунна а, цуьнан   командина  а жимма   аьтто   ца  тоьура. «Зенитана»  кху  шарахь   дуьхьало   йина   цхьа а   комнада  яц. Иштта  церан   ловзар   гуш   болу   хьеший   гIеххьа   боьхна   хьийзара. «Терекан»  тIаьххьарчу   секундашкахь   толам  баккха  йиш  яра,  амма цу   дийнахь   царна   аьтто  ца тоьара. Вайн   командин   тIелатархочо   тоьхна  буьрка штангех   кхетта   сецира. Матч   йолалуш  серлонан  таблона   тIехь хилла  счет   кхин   хийца  ца луш,   чекхделира   цхьаьнакхетар.
26-чу сентябрехь  22-чу  туран   матчехь   Соьлжа-ГIалара   «Терек»  хьошалгIахь   ловзур  ю Москва  гIаларчу  «Локомотив»   командина   дуьхьал.
Футболъезархошна    довзийта  лаьа  21-чу  туран   кхидолу   жамIаш:  ЦСКА (Москва) – «Сибирь»  (Новосибирск) – 1:0; «Спартак»  (Нальчик) – «Спартак»  (Москва) – 0:2; «Анжи (Махачкала) – «Рубин» (Казань) – 0:1;  «Томь» (Томск) – «Локомотив (Москва) – 1:1; «Сатурн» (Раменское) – «Динамо» (Москва) – 3:2; «Алания»  (Владикавказ) – «Ростов» (Дона-тIера-Ростов) – 0:0;  «Амкар» (Пермь) – «Крылья Советов» (Самара) – 2:1.

{mosloadposition user9}


При копировании материалов ссылка на сайт обязательна

test 2Новости СМИ2