Соьлжа-ГIалахь йийр   ю   полиэтиленан  биргIанаш  яран   завод.  Иза   ярна   оьшуш   долчу   50 миллион   соьман  барамехь  инвестицеш  йина. Цу  хьокъехь  хаам  бина  Соьлжа-ГIалин   мэран   заместитела   Джамалуев Адама. Нохчийчоьнан   коьртачу   шахьарахь  цу тайпана   завод  яран  хьокъехь   барт   хилла Москвахь. Цигахь  цхьаьнакхийтира  Соьлжа-ГIалин администрацин   векалш а,  полиэтиленан  биргIанаш  яран  Россехь   уггар   йоккха  йолчу   заводан   куьйгалхой  а. Цара   ечу  биргIанех пайдаоьцу   хи далош, кхидолу  хьашташ   кхочушдеш.

Полиэтиленан  биргIанаш  арахоьцуш  йолу  «Бородино-пласт»  Московски   областехь  ю. Кхузахь  арахоьцуш   йолу   биргIанаш   тоьлла  лерина  дуккха а  гайтамашкахь  а,  конкурсашкахь а. Россехь  дуьххьара   кху заводехь  дIадолийра  цу тайпана  биргIанаш  арахецар. Заводо   цхьана шарахь 30  эзар   тонна  биргIанаш  арахоьцу. Цаьрга  доккха   хьашт-дезар   ду   вайн   махкахь   а,  ткъа  иштта   дозанал   дехьа а.
«Бородино-пласт»  заводан   генеральни  директора  Ощепков  Михаила  дийцарехь,  кху  заманан тоьлла   оборудованица   болх  беш  хиларо  царна  таро   ло  дуьненан  стандарташна жоп  луш  йолу   продукци   арахеца.
Соьлжа-ГIалахь  цу  тайпана   завод оьшуш  хиларан   цхьа  а  шеко яц. ХIунда   аьлча  Соьлжа-ГIалара   дукхах   йолу   хин   коммуникацеш  ширъелла  ю,  Iаламат  дукха   болх бу   хин  биргIанаш  хуьйцуш  бан  безаш   берг. Иза хьесапе  а эцна   Нохчийн Республикан Президента  Кадыров  Рамзана   пачхьенан  администрацин  куьйгалхошна   тIедиллира  оцу   декъехь   хъокала доллу гIуллакхаш  дар. Цул  тIаьхьа  кIира  а  далале  Соьлжа-ГIалин   мэрин  векалша   дийцарш  дан   долийра  Москварчу  инвесторшца. Ширъелла биргIанаш  хийцаран  болх  хIинцале   дIаболийна.
Амма  биргIанашка  доккха   хьашт-дезар  хиларо   лоьху   вай   долчохь   полиэтиленан биргIанаш  арахоьцу  завод  яр. Цо таро   лур ю  республикана биргIанашца  кхачо   йина    ца  Iаш,  Соьлжа-ГIалахь  кхитIе   а белхан   меттигаш   кхолла. Иза  а ма дац   кIезиг  маьIна   долуш   гIуллакх. ГIалин  Iедало  хIинцале   билгалйина   завод  ен йолу меттиг. Йина   яьллачул   тIаьхьа   цо   баттахь   арахоьцур  ю  ши эзар   тонна   тайп-тайпана   диаметраш   йолу   полиэтиленан  биргIанаш. Ткъа  завод  кху  гурахь   йина   ялийта   езаш ю. Кхузахь  арахецна   продукци  Нохчийчохь  йоьхкина   ца  Iаш Къилбаседа  Кавказан   кхечу   регионашкахь   йохка  лоьруш  ду.

С.ХАСАНОВ.
Суьрта тIехь: кху  тайпа биргIанаш  арахьоцур  ю заводехь.
Р.Истамуловн  сурт.

{mosloadposition user9}


При копировании материалов ссылка на сайт обязательна

test 2Новости СМИ2