доллар    57.47 $
евро 67.64 €
23 октября, 00:10
+12 в Грозном

Дагахаь а латтаво, дозалла а до

31 августа в 09:33 (2010 г.)
ХIокху деношкахь республикехь шуьйра билгалдаьккхира   Нохчийн Республикан  хьалхара  Президент, Россин Турпалхо Кадыров Ахьмад-Хьаьжа  вина   59  шо кхачар. Ведомствошкахь, предприятешкахь, культуран  учрежденешкахь, иштта дIа  кхечанхьа  а дIадаьхьира оцу денна   лерина долу даздарш. Мовладаш   дийшира,  сагIанаш   дехира, доккха  сий дарца  дагалецира нохчийн   сийлахь воI. А-Хь.Кадыров   вина де  иштта  даздарца  билгалдаьккхира   Нохчийн  Республикан  экономически   кхиоран,  махлелоран   министерствон   коллективехь  а. Цунна   лерина   хиллачу  цхьаьнакхетарехь  къамелаш   динчара   даггара   дийцира  А-Хь.Кадыровн   дахарх а, белхан   гIуллакхех а,  нохчийн  халкъан   дахарехь  цо   лелийначу   маьIнех  а лаьцна.
 
Ша  аьлча,  Нохчийн Республикан экономически   кхиоран,  махлелоран   министра  Магомадов  Iабдуллас  дийцира:
– Нохчийн халкъ  гуттар а хилла  майралла,  къонахалла,  стогалла  йолуш хиларца. Вайн халкъан   векалийн   майрачу, турпалаллин гIуллакхех лаьцна  яздина   дуккха а  ду.  Амма дукха  хьолахь  халкъан   иэсехь   буьсуш,  шайгахь  турпалалла  хилла  ца  Iаш,  амма шаьш   шайн   ца кхоор а,  кхечарех  доглазар а, халкъан  кхолламах  жоьпалла  хилар а   санна йолу   дикаллаш   йолуш берш  кIеззиг    бен  бац. Иштта   адамаш  халкъан  дозалла,  тIекхуьчу чкъоьрнашна   масал   хуьлий  дIахIуьтту. Дуьйцийла   йоццуш, вайн  республикан керлачу исторехь иштта стаг  ву Нохчийн Республикан хьалхара  Президент,  Россин Турпалхо Кадыров Ахьмад-Хьаьжа.
А-Хь.Кадыров   Iедалан  коьрте  веара нохчийн халкъана  уггаре   а хала хиллачу муьрехь, ерриге а регион  дIалаьцна   тIемаш   болуш а, массанхьа  а законехь  йоцу   герзашца  йолу  тобанаш   йолуш а  хиллачу  хенахь. Цо и гIулч  яккхар   Iедалан   коьрте  кхачар   Iалашо   йолуш  доцуш,  ткъа ца дича   ца долу   гIуллакх  дара. Иза  гуш  ду   цхьана   къамелехь   цо аьллачу  дешнашкара:  «Со  тешна  ву  Нохчийн Республика зазадоккхуш  хир  йолу,  халкъ  токхонехь  а, кхерам  боцуш  а  дехаш  хир долу   хенаш  йогIург хиларх,  тIаккха   дуккха а  хир  бу  оцу   хьелашкахь  жоьпаллин   даржийн  коьртехь  хила   лууш  берш,  ткъа  тахана оьшуш   бу  шайна  хIумма а   оьшуш, са   лоьхуш  боцурш, нагахь  санна  оьшуш  хилахь, шайн халкъана дахар  а  дIадала кийча   берш».
Билггал,  шатайпа  башхаллаш  йолуш а, хиндерг   генна   хьалххе  гуш  а волу   стаг   хиларе   терра, Ахьмад-Хьаьжа  кхеташ   вара  ша хьалхахIоттийначу   Iалашоне  – нохчийн  халкъ  зазадоккхуш  хиларе – кхачарна   стагана  уггаре   а деза   долчух – шен   дахарх ша  къаста   тарлуш   хиларх.
Тамаш бойтуш дара иттех шарахь  кегаре болуш  хиллачуьра   яларна  карарчу  хенахь  республикана  хIун   оьшу, тIейогIучу  хенахь  иза муьлхачу   новкъа  дIаяха  еза ша  республикан   коьртехь   хиллачу   йоццачу   хенахь  стага  билгалдаккхар. Тахана  вай  зазадоккхуш   хилар  тIаьхьарлерчу  шерашкахь  баьхначу Iаламат  баккхийчу   кхиамийн  ондда  чIагIо хилла дIахIоьттиначу, А.-Хь.Кадыровс биллинчу   буха тIехь  лаьтташ  ду.
Шен балхахь  Нохчийн  Республикан  хьалхарчу  Президента тидам   ца  беш  ца   дитира  экономикан,  социальни  политикан   цхьа а дакъа; иза  кхиира   дешар, могашалла  Iалашъяр, культура, спорт, кхидерш а  кхиоран   баххаш   дахка, агропромышленни   комплекс а, машенашъяр а, яйн,  дечигах  гIуллакх  даран,  медицинин   промышленность а   санна   долу   экономикан  бух  буьллу   дакъош   меттахIитто  доло  а, уьш   кхидIа а   кхиорна   бух билла а. Цуьнца   цхьаьна  Кадыров  Ахьмад-Хьаьжин   коьрта  кхиам  лору   ас   вайн  халкъ  ийманехь,  гIиллакх-оьздангаллехь  кхиорна   тIехьажийна   болу  цуьнан  болх,  90-чу  шерашкахь  чIогIа   йоьхна  хилла  халкъан гуттарлера   морально-этически  нормаш а, гIиллакхаш а   меттахIиттор.
Сийлахь-боккхачу  Даймехкан  тIамехь  баьккхинчу  Толамандерригхалкъан   дезачу  дийнахь  кхелхира  Нохчийн Республикан  хьалхара Президент  Кадыров  Ахьмад-Хьаьжа. ХIетахь  Россин  Президента аьлла  ма-хиллара, – иза   дIавахана  тоьлла. Иза   тоьлла   дIавахара,  хIунда  аьлча   цо кхочушдан  дагалаьцнарш  а, цуьнан   сатийсамаш  а тахана  кхочушхилла   хиларна. ХIора нохчичун дагахь иза гуттаренна  а висина   шен халкъан  тешаме,  муьтIахь  кIант   хилла.
А.-Хь.Кадыровс  дIадолийна долу   вайн  республика  меттахIоттор  тахана   кхидIа   дIахьош  ву  Нохчийн Республикан  хIинцалера  Президент,  Россин  Турпалхо Кадыров  Рамзан. Цуьнан   куьйгаллица  жигарчу   боларшца   кхуьуш   а,  тIаьхь-тIаьхьа  ша-шена   кхачо еш  а йолу   регион хилла   дIахIуттуш а ю Нохчийн Республика. Тахана   Ахьмад-Хьаьжа  вайна  юккъехь   вацахь а,  иза вехаш ву вайн дегнашкахь а,  вайн  гIуллакхашкахь а. Вай  гуттар  а  баркалла  бахарца   дагахь а  латтор  ву  иза.
Дала ма  эшаболйа вайн   махкана   иза   санна  болу   кIентий!
Цхьаьанкхетарехь А.-Хь. Кадыровн  цIарах  даггарчу  безамца,  ларамца дуьйцуш, иштта  къамелаш   дира   кхечара а.

С.ЛАЛАЕВ.   
 

{mosloadposition user9}

Если нашли ошибку в тексте выделите ее и нажмите Ctrl+Enter

ОБСУЖДЕНИЕ

Комментариев нет