1977-чу  шарахь  йина  ю  Магдиева  1айшат. Х1етахь   Казахстанехь   бехаш   бара   церан доьзал. Шен   нийсархой   санна,   цигахь   яхара   иза  хьалхарчу   классе. – Казахийн къомах  яра тхан  хьехархо Ибрагимова Савле Ибергиевна яра, – дуьйцу   1айшата. – Дика  хьехархо   хиларал  совнаха   ч1ог1а   г1иллакхе,  оьзда,  къинхетаме  зуда  яра  иза.  Цунна  хаьара  ша   хьохург   х1ора  а  дешархочун  кхетаме  дилла а, х1оранан а, нанас  доьзалхочун санна,   дог эца а. И бахьанехь  кхоллабелира  сан  хьехархо   хила   лаам.1985-чу  шарахь  Даймахка  ц1а   бирзира  1айшатг1еран  доьзал. Грозненски районан  Чурт-Тог1ехь  севцира   уьш баха,  шьш  бехачу  юьртахь   чкхъяьккхира  ишкол. Шен  лаам  кхочушбан  Соьлжа-Г1аларчу  хьехархойн  колледже  деша   яхара  1айшат. 1998-чу шарахь,  колледж чекхъяккхина  а  ялале,  ша  ехачу   юьртарчу  ишколе   юьхьанцарчу  классан  хьехархочун  балха   яхара.
1айшат йоккхаера   бераллехь   сатийсина  шен  лаам  кхочушхиларх. Цо   доггах  бора ша  безаш  т1елаьцна  болх,  цунна   ч1ог1а  лаьара   шен  дуьххьарлера   хьехархо  Савле  Ибергиевна   санна  дика  хьехархо   хила. Х1етахь  дуьйна,  шен  ницкъ  ма-кхоччу, ша  хьоьхург берийн  кхетаме дилла  г1ерташ   схьайог1уш  а ю  1айшат.
– 1айшат  дика  хьехархо   хилла ца  1аш,  муьлххачу а х1уманна  т1ехь  дика  накъост а ю, – боху ишколан  директора   Курбанова  Хедас.. – Ша   кху   коллективе  еъчахьана  цо цкъа а   ца   гайтина   г1иллакх  дацар  я   ледардо,  даима а  дешархошца а, хьехархошца  а  к1еда-мерза,  г1иллакхе   ю иза,  тхуна   боккха  юьхьк1ам  бу  х1ара   санна  болу   белхан   накъостий  хилар. 1айшата  шен  дешархошка   даима  а  олу:
– Шаьш  хьанах  схьадевлла,   муьлш  ду  а  хууш,  вайн   къоман  юьхь,  сий  лардеш,  г1иллакх-оьздангаллех  ца   духуш   хьанал дахалаш. Шух   йоьзна   ю шуна   вайн   къоман кхане.

Р.МУСИПОВ.
Авторан сурт.  

{mosloadposition user9}


При копировании материалов ссылка на сайт обязательна

test 2Новости СМИ2