И баланаш бицбан  йиш  яц
Терсамбиев Рийко  цIера  Гилнара  ву, тахана  а цигахь  вехаш  ву  иза.  ЦIера арадохучу  хенахь 12  шо долуш  хилла  Рийко. Сан дехарца  цо доцца дийцира  шаьш  хьегначух, лайначух лаьцна.  Кхиболу  вайн  наха  санна,  хала   мур  баьккхина  цо а, цуннан гергарчу  наха а.
– Тхо  Гилнахь  дехаш  дара,  цигахь дуьнен  тIе  а  ваьлла  со, – долийра  шен къамел  Р.Терсамбаевс. – Тхан  дас  даха  атта  хир ду аьлла, Хасав-Юртахь цIенош а эцна,  дохадале охьадаьхкина   цигахь  дехаш  дара  тхо.Нохчий  бохочу  Iуьйранна  тхан   да-нана, йиша  цIахь  дацара. Уьш  Гилна, гергарнаш  болчу  хьошалгIа  бахана бара. Тхо  кхо бер: со а, ваша а,  кхин цхьа   йиша а Хасав-Юртахь цIерпошта тIехь дIадигира. Да-нана  сан  шолгIа  йиша а Гилнара дIадигнера. Да, тхуна   кхин гина   а  вац. Тхуна   тIе  кхачале   иза веллера. Ткъа со,  воккхах волу  ваша,  йиша – Ошски  областан   Корован  олучу  юьрта   кхечира. Тхо кхоъ  цигахь  ду  аьлла хезна  хиллера тхан  нанна. Комендатурехь бакъо  а  яьккхина, ялх бутт   баьлча   йиша а ялош,  тхо долчу   схьаеара тхан   нана. Цул  тIаьхьа   шелъелла, цомгаш  хилла,  Корованхарчу  больнице  охьайиллира тхан  нана а,  шиъ йиша а. Цу хенахь  ФЗО-хь доьшуш  вара   тхан   ваша, цунна цигахь  дечиган  пхьеран, кхин цхьацца  говзалла  Iамайора. Цхьана суьйранна  нанна  цамгар   тIетаьIна   аьлла, со  больнице  кхайкхира. Вуон  хьал долуш яра иза. Дукха хан   ялале  елира  тхан  нана. Цул  тIаьхьа  дукха  хан   ялале, сан   карахь  елира  ши йиша а. Иштта  да-нана,  ши йиша  цигахь дитина  со а, сан   ваша а  цIа вирзира, цIа даха бакъо   яьлча. Дала кхин  ма  гойтила-кха  и саннарг цхьанна а. Дийца-м  шортта  дара   цигахь  хьегначух,  делахь а дерриг   дийцина   вер вац, – аьлла  дерзийра  шен   къамел Рийкос. Гуш  дара  оцу   гIийлачу стагана кхалхорах  лаьцна   къамел  дан   хала  хилар. Делахь а лайна  харцонаш,  баланаш  бицбан  йиш  яц  вайн.
АЛИЕВ Мохьмад,
Гуьмса гIала.
Авторан суьрта  тIехь: Гилнара   вахархо   Терсамбиев  Рийко.    

{mosloadposition user9}


При копировании материалов ссылка на сайт обязательна

test 2Новости СМИ2