доллар    59.39 $
евро 70.05 €
18 ноября, 03:50
+4 в Грозном

Цара Iалам хаздо

4 мая в 17:33 (2010 г.)
ТIееъначу  бIаьстено  дерриг Iалам  самдаьккхина. Дитташа а, зезагаша а   заза хецна, буц  сенъелла. Массарна а оьшуш  долу  Iуналла  деш  го вайна  арахь «Зеленстрой» муниципальни  унитарни   предприятин  комбинатан  белхалой. Паркашкахь, скверашкахь,  некъан  йистошкахь  синтарш а\дуг1уш, зезагаш  дуьйш  а,  кхиош а ду  цара. Дукха  хьолахь  и болх беш  берш зударий  бу. Ненан бере  санна,  Iаламе безам  ца хилча  балур  болуш  болх а  бац иза. Зезагаш а,  дитташ а  девзина   ца  Iаш,  церан  мотт хаа  беза   Iаламца  гергарло  долучарна. Царна  хи  маца  деза,  уьш  маца шелло  а,  йовхо  сов  маца  йолу  а. Олуш  ду, муьлхха а  зезаг, ша  хьаьстича,  деллало, олий. «Зеленстрой» белхалоша  тIаламца  леладаре  терра,  дан а  ду Соьлжа-ГIалара 1алам исбаьхьа. Зезагаш лелош берш, дукха  хьолахь,  доккха  зеделларг   а долуш,  зударий бу. Суртдиллархочо  дуьллу  сурт санна  говза а, исбаьхьа а  клумбаш  йо  цара. Цу тIе дуьйш долу  зезагаш беснашца  юх-юххехь  товш  дерш  къастадо,  цул сов,  тидаме  оьцу  массо а  церан   лазам. ХIокху  деношкахь  бара  «Зеленстрой» комбинатан  белхалой  1-ра  Май   тIекхачале  жигара   къахьоьгуш. Кхечу  регионашкахь  зезагаш а,  синтарш а  дIадер   май  баттахь  бен   долалуш  дацахь,  вайн  республикехь  дуьххьара   алцIензIамаш  (тюльпанаш) дIадийра  22-23-чуй  мартехь. Уьш   20 эзар  зезаг дара. Нохчийн  Республикан  Конституцин  денна  лерина   шатайпа   совгIат  дара   иза махкахошна «Зеленстрой» организацис динарг. Кадыров Ахьмад-Хьаьжин  цIарах  йолу  проспект а, сквер а,  журналистийн  сквер  а, гIалин  администрацин хьалхара бошмийн  дакъош  а   кхелира цара   цIечу а,  можачу  а  алцIензIамашца. Цу  декъехь  болх  кхибеш  бу  зезагашлелорхоша. Уьш  дерриг а  кхечу  республикашкара   чудохьуш  ду:  ГIебартойчуьра а, Къарачойн-Чергизера  а. «Зеленстрой»  комбинатан  коьртачу  инженера  Гакаева Зураа  ма-дийццара,  вайн  махкахь  зезагаш  кхиош 4  теплица  бен яц,  цигахь   дуьйш  дерш цхьана шарна   дуьйш долу  зезагаш ду. Уьш  эзар  зезаг ду. Теплицаш  кхин а  сов  хир яра,  цаьргара  2004-чу  шарахь  латта  схьадаьккхина цахиллехь. 2008-чу  шарахь Ханкалахь  латта  делла  шайна,  амма  ахча  ца хиларо  стохка  бен   цу тIе  дерза  йиш ца хилийтина   шайн, бохура   Зураа. ГIалин Администрацино луш  долчу  ахчанах  «Зеленстрон» куьйгалхой  синтарш эца  лерина бу. Цкъачунна  билгалдаьккхинарг  1239 синтар  ду. Уьш  дIадуьйр  ду  некъан а  йистошкахула. Уггар  хьалха  ден  ца  делларш  дIа а дохуш,  керланаш  дугIуш  болх  бийр бу белхалоша. Хууш ма-хиллара, уьш  стоьмийн синтарш  дац. Уьш  декоративни  дитташ  ду:  хьех (липа), лега (клен),  наж (дуб), каштан, Iаьржа  бIар. Цара   чан   тIеоьзна   ца  Iаш,  арара гIовгIа а  лахйо. Кхушара  дIадуьйчу  дитташна   тIе   багрянис  а кхетар  ду.
Вайн махкахь  хазалла   кхуллуш йолчу  комбинатан куьйгалхо  ву  Абдулаев Ахьмад. Балхана   сагатдеш а,  коллектив кхиамашка  кхачо  хьелаш  кхуьллуш а схьавогIу  иза. ТIом   уггар  марсабаьлла  хан   яра,  Ахьмад хьалхалера  белхалой  схьагулбан   араваьлча.
Цо  уьш  гул а  бира. Iаламца  дахар  доьзна  нах бара  уьш. Муьлххачу  а  меттигах  а,  къухдаьлла  лаьтташ  елахь а,  дIатесна  латтахь а, йоццачу  хенахь, бIаьргана   ган  тамехь йолуш,  хазалла  кхуллу  цара. Вайн  республикан  Президента  Кадыров  Рамзанан «Нохчийчоь Россин  Федерацехь  уггар  хаза  регион  хир ю», –  боху дешнаш  чIагIдо «Зеленстрой» комбинатан  коллективо.
Цара  къахьоьгу  Iалам  хаздеш. Шайн дезачу  деношна   зезагашлелорхой  Лорсановн проспектехь  дIадийна  6 эзар  спирей а,  журналистийн   скверехь  дийна  кримулаш а,  маргариткаш а,  Кадыровн  проспектехь – комус а, вербена а,  питона а,  алисум а. Иштта, бай  хила  тамехь  йолчу  меттигашкахь  газонаш  йина. ЦУ тайппана вайн  урамаш,  проспекташ,  бошмаш, сквераш  хазъеш схьабогIу  «Зеленстрой» комбинатан  белхалой.

Б.ДУДАЕВА.   

{mosloadposition user9}

Если нашли ошибку в тексте выделите ее и нажмите Ctrl+Enter

ОБСУЖДЕНИЕ

Комментариев нет