Таханлерчу  дийнахь  республикал  арахьа   Iаш  верг 600 эзар   гергга  нохчи ву. Иза  билгалдаьккхира  Нохчийн Республикан Президентан Кадыров  Рамзанан Нохчийчоьнан  арахьарчу  зIенийн,  къоман  политикин,  зорбанан,  хаамийн  министраца  Саралиев  Шамсаилца, республикан Президентан пресс-секретараца. – Президентан а, Правительствон  а хаамийн-хьесапдаран  урхаллин  хьаькамца  Керимов   Iальвица   хиллачу  цхьаьнакхетарехь.– Царах 300 эзар сов   гергга  нохчи Россин   тайп-тайпанчу  регионашкахь Iаш  ву. Бисинарш  дозанал  арахьа  –  Европехь,  Шемахь,  Иорданехь,  Хонкарахь,  СаIудийн Аравехь, ур-аттал Иракехь  Iаш   бу.  Алссам   нохчий  беха   Казахстанехь а, ГIиргIазойчохь а. Ткъа  республикехь вехаш   верг билггал  маса  нохчи ву хуур ду Нохчийчохь  бахархой   дIаязбар  чекхдаьллачул   тIаьхьа. Уьш  дIаязбар   хIинца   дIахьош  ду, – бохура Р.Кадыровс. Цо иштта   билгалдаьккхира   Европан   мехкашкахь а,  Герггарчу  Малхбалехь а  Iаш   болчу   нохчашца   юххера  зIенаш  таса   езаш   хилар.
«Дукха  хан   йоццуш  со  Хонкара а, Шема а ваханчу хенахь  сан  цхьаьнакхетарш  хилира  цигахь   Iаш   болчу  нохчашца. И адамаш  боккъал а Даймахках дог лозуш  ду. Уьш  баккхийбебо   вайн   цIахь  хуьлуш  болчу   дикачу  хийцамех. Цара  дозалла  до  шаьш  нохчий   хиларх, цхьаболчарна   шайн  ненан  (нохчийн) мотт  ца хаахь  а. Царна   лерина   культуран  мероприятеш  вовшахтоха   еза   аьлла  хета   суна. Цу юккъехь – тайп-тайпана  гайтамаш,  концерташ,  кхоллараллин  интеллигенцица   цхьаьнакхетарш. И дерриг  гIуллакхаш  тIехьовсийна  хила деза  нохчийн   мотт, вайн  Iадаташ, гIиллакхаш,  ламасташ,  культура  йовзийтарна,  марзъярна. Масала, Шемахь   Iаш  болчу  нохчаша   дуьйцура «Грозный» телеканал  спутникаца  гайта   долийначул  тIаьхьа   шайн  бераш   нохчийн   мотт  Iамо   дуьйладелла   бохуш. «Республикан  арахьа  бехаш  дуккха  а нохчий  бу. Цхьаболчу   мехкашкахь  дийнна   ярташ а,  шахьараш а  ю  шайна   чохь   Iачарах  дукхах  берш  нохчий  болуш. Хонкарахь волчу хенахь  суна  ларамаза   хиира   цхьана   юьртахь  вехаш   ворхI эзар   сов нохчий  хилар. Церан  юьртан  куьйгаллхо а  ву нохчи. И санна  йолчу   меттигашка  вайн   векалш   бахийта  беза,  Даймахкаца  йолу   церан   зIенаш  хедда   йоций  хаийта. Уьш  болчохь  вовшахтоха   еза  царна  хазахеташ йолчу   культуран  мероприятеш», – бохура  Нохчийчоьнан куьйгалхочо.
Республикан  Президентан а, Правительствон а  хаамийн-хьесапдаран урхаллин  хьаькама  Керимов  Iалвис  билгалдаьккхира оцу  декъехь  хьокъалла  болу   болх  хIинцале   дIахьош  хилар.
– Дозанал арахьа бехачу  нохчийн  мотт ца  хуучу  вайн   вежаршна   лерина   Iаьрбийн  а,  туркойн  а меттанашкахь  йолу  киншкаш  арахеца  лерина  ду тхо. Оцу  киншкаш тIехь   хир ду   нохчийн  яздархойн,  поэтийн   говзарийн, фольклоран,  и.дI.кх. гочдарш. Биъ  бутт   балале   хьалхара  тираж  кечйийр ю оха. Уьш  дIасаяржор ю  нохчий  бехачу  мехкашкахь, – элира I.Керимовс. Иштта  хаам  бира  Нохчийн Республикан  Президентан а, Правительствон  а пресс –службера.

Д.ХАМЗАТОВ.  

{mosloadposition user9}


При копировании материалов ссылка на сайт обязательна

test 2Новости СМИ2