Вайн Республикехь тIеман  хьал  хIоттале  хьалха  болх биначарех  яра  СемаIашкара консервни  завод. ХIинца  меттахIиттийнчу  предприятех  цхьаъ  ю иза. Вайна  дагадогIу, хьалха  тайп-тайпана  хасстоьмаш, стоьмаш  хи чу бухкура  цигахь,  кечйора варенеш а, компоташ а. Шатайпа  дика  чам  болуш а хуьлура уьш. Ткъа тахана  и санна йолу  заводаш а, предприятеш а  меттахIиттош  схьабогIу  вайн  куьйгалхой. МеттахIитторал  совнаха, гIишлонна тIера продукци  арахоьцучу  оборудованина  тIекхаччалц, дерриг а  керлачу проекташца а, технологешца а деш ду. СемаIашкара  завод  шина  муьрехь  йина  ер ю. Июнь  баттахь  болх  бан  йолаяла  езаш  хьалхара цех ю, ткъа декабрь  чекхбалале, шолгIа  цех а  ялийта  дагахь  бу  цуьнан  куьйгалхой. ХIинца  консервийн  продукци  арахоьцучу линин амонтаж  ю еш. Цу гIуллакхна  Россин кхечу  регионашкара говзанчаш кхайкхина.  Заводан директора  Серсултанов  Мохьмада ма-дийццара, цигахь  хи чу  йохка а, кечъян а  леринчу  продукцин  дуккха  а тайпанаш  ду. Хасстоьмаш а, стоьмаш а хи чу  бохкарал  совнаха, заводан  белхалоша  йийр  ю  варенеш, шайна  юккъехь  бIарийн  тIамарех  ерг а  йолуш,  компоташ, муттанаш, томат кечйийр  ю горох, хьонка. Терахьаш далийча, варенеш, компоташ хир ю  1 миллион банка, томат –  12 миллион банка, горох – 5 миллион банка, муттанаш – 7 миллион  банка. И гайтамаш  т1ехкхочушбан лерина  бу  заводан куьйгалхой. Ткъа, стоьмаш а, хасстоьмаш  а  заводана   латтор  болуш, пачхьалкхан   бахамашца  беш барташ  бу. Кхин  цхьа   хIума а ду,  дIадаханчу  шерашкахь  зеделларг   тидаме  а  оьцуш,  заводан  куьйгалхоша  бахархошкара  стоьмаш  а,  хасстоьмаш а  схьаоьцур  бу. Цул совнаха, нахана  белхан   меттигаш  а хир  ю  цигахь. Завод  меттахIоттош  оьшуш  долу  ахча  дийцича, цкъачунна  билгалдаьлларг  132 миллион сом ду. И дерриг   тидамехь  ду  вайн Iедалан. Цара терго  йоцуш  ца дуьту  завод  меттахIотторан  гIуллакхаш, хIунда  аьлча цо  вайн  махкана  пайда  бина  ца Iаш, Россин  рынкашка  а  йоккхур  ю  заводехь  кечъеш  йолу   продукци. ХIинццалц  болх  беш  Соьлжа-ГIалара  цхьа  консервни  завод  бен  ца  хиллехь, аьхка  дуьйна  болх  бан а  йолаелла, шен  хьалхалера  цIе  юхаерзор  ю СемаIашкарчу  консервни  заводо.
Б.ДУДАЕВА.

{mosloadposition user9}


При копировании материалов ссылка на сайт обязательна