Кху кIирандийнахь  даздаран  хьолехь  схьадиллира  Соьлжа хинна  тIехула тиллина  тIай. Нохчийчоьнан пачхьенехь  уггар  доккхачех  ду иза. Цуьнан  йохалла  80 метр  сов ю, ткъа шоралла – 27  метр. ЦIен аса   хадийра  Нохчийн  Республикан Президента Кадыров  Рамзана а, Нохчийчоьнан  автомобилийн  некъийн  министра Тумхаджиев Абубакара а, Соьлжа-ГIалин  мэра Хучиев  Муслима а.– ХIара  тIай   схьаделлар  мехала  гIуллакх  ду. Цо  цхьаьнаюзу   пачхьенан  малхбален  а, малхбузен а  агIонаш. Цунна  ду хIара  схьаделлар  доккхачу  маьIне. ХIинццалц  киралелон  ерриг а  транспорт гIали  юккъехула  чекхйолий   яха   езаш   хуьлура  промышленни  зоне. Иза   гIалахошна   а, республикан  бахархошна  а  чIогIа  бегIийла   доцуш   дара. Цул  сов   даккхий   киранаш  гIали   юккъехула  дIаса  дахьа а  дацара   данне а  атта.
Къаьсттина мехала  ду  кху  тIай   тIехула  транспорт   лела   йола  ялар мехкадаьттанах  гIуллакхдаран  завод  ян  йолочу   юьххьехь  нисдалар. ГIали   юккъехула  дIасаволийла а  хилла  хир  дацара   тIай  дар   йохьаццачу хенашкахь  чекх  ца  даьккхинехь. Завод  ечу  метте  дохьуш  долу   дерриг а  киранаш   гIали   юккъехула  схьадан  дезар   дара, – бохура   Нохчийчоьнан  куьйгалхочо. Цо  дийцарехь  дукха  хан  йоццуш   хIара  куп  уггар а  чолхечух  лоруш  яра   кхузара   тIай  дохийна   хилла  хилар   бахьана долуш. Оцо дуккха  а халонаш  кхуллура   машенашца   дIасабоьлхучарна  а, ткъа  иштта  кхузахь  Iаш  болчу  бахархошна а.
Нохчийчоьнан  Президента шен а, нохчийн дерриг  халкъан а  цIарах  баркалла  элира   хIара   тIай  дарехь  дакъалаьцначарна   массарна а. Иза  дуьненахь  адамашкара  баркалла  а, эхартахь  Делера  ял а  хир  йолуш  гIуллакх  ду. ТIай  дарехь   хьанал а, хьуьнаре  а къахьегначарна   совгIаташ  дира Нохчийн  Республикан  Президента Кадыров  Рамзана. Иштта  «Нохчийн Республикан  дуьхьа   хьуьнарш  гайтарна»  мидалца   совгIат  дира «Мовла» ООО-н генеральни директорна Мовлаев  Бувайсарна, «Нохчийн  Республикан  хьакъволу   гIишлошъярхо» сийлахь  цIе тиллира  «Федеральни  некъийн  агентствон  Къилбаседа  Кавказан автомобилийн  некъаш» ФГУ-н хьаькаман  заместительна Лечхаджиев  Русланна.
Кадыров  Рамзана  билгалбаьккхира  Россин  Федерацин пачхьалкхин  Думин  депутатан Делимханов Адаман  къинхьегам а. Иза  вара   тIай   дарна   тIехь  верасалла деш а, терго   латтош а. Шех  дозуш  дерг   дерриг а  дина   цо тIай   сиха а,  лаккхара   дикалла   йолуш а дина  далийтарехь.
Шен  къамелехь Соьлжа-ГIалин мэра  Хучиев  Муслима  билгалдаьккхира  хьалха   кху  меттехь  хилла  долу  тIай   15 шо  хьалха   бомбанаш, ракеташ  тоьхна   дохийна   хилар. ХIетахь  дуьйна масийтта  километр деха  долу   гIалин   цхьа   дакъа шина эхе   декъна  лаьтташ  дара. «Дерриг а  хийцадала   доладелира  Президента  Кадыров  Рамзана керла   тIай   дан деза   аьллачул тIаьхьа. Цуьнан  тIедиллар  мелла а дика   кхочушдархьама  оха  тIай   даран  гIуллакхана  юккъе  озийра   тоьлла  говзанчаш а, кхузаманан  техника а. Лаккхарчу  боларшкахь  дIабаьхьира  болх. Цуьнан   жамIаш  шуна  гуш ду. Берриг  а гIалахойн  цIарах  суна  даггара  баркалла ала   лаьа   Нохчийн Республикан  Президентана  Кадыров  Рамзанна  а, кхузахь  къахьегначу  берриг  гIишлошъярхошна а, говзанчашна  а, царна   тIехь   хаарца   куьйгалла  динчарна а», – элира  Хучиев  Муслима.
ГIишлошъярхойн а, кхуза  гулбеллачеран а  доккха  самукъадаьккхира  республикерчу   хелахарийн  коллективаша а,  иллиалархоша а, эшаршлакхархоша а. Цу  хьокъехь  хаам  бира  Нохчийчоьнан  Президентан а, Правительствон  а  пресс-службехь.

Хь.ПАШАЕВ.    

{mosloadposition user9}


При копировании материалов ссылка на сайт обязательна

test 2Новости СМИ2