Цхьаьнакхетаре гулбеллера НР-н Iилманан а, дешаран а министран заместительш, Зубхаджиев Мохьмад-Iела а, Усманов Ахьмад а, йаздархойн Союзан декъашхой а, иштта кхиболу хьеший а.

Суьйре дIахьуш дешархоша лерамечу хьешийн тидаме йиллинера лерина кечйина программа. Цуьнан гурашкахь цара нохчийн меттан дозаллех, хазаллех лаьцна дуьйцуш йолу, махкахь гIарайевла йевзаш йолу байташ а йийцира, иллеш а элира, эшарш а лийкхира.

Цхьаьнакхетар нохчийн ламастех дуьзна дара, хьешашна а чIогIа тайра иза. Цара дехар дира дешархошка шайна а, нийсархошна а йукъахь ненан мотт бийцар а, Iамор а чIагIде аьлла. Иштта, мотт дIаьбаьлча къам доцуш лоруш хилар а дийцира.

Хууш ма-хиллара, оханан беттан 25-гIа де — нохчийн меттан деза де лерина ду. Иза билгалдаьккхина вайн Мехк-Дас, Россин Турпалхочо Кадыров Ахьмад-Хьаьжин Рамзана даьккхина долчу 2007-чу шеран № 207 йолчу Указаца. Нохчийн Республикин Конституцин 10-гIа статья тIехь йаздина а ду и. Ткъа вайн махкахь иза хIора шарахь шуьйра даздеш ду.



При копировании материалов ссылка на сайт обязательна