ГIурбан дийнахь дуьхьалойаран акцин гурашкахь Стокгольман коьрта маьждиган хьалха Къуран дагор магийна Швецин полицино. 

Цу хьокъехь шен хетарг довзийтира Нохчийн Республикин Муфтийс Межиев Салахьа. 

«Бусалбанийн дезачу-ГIурбан дийнахь рогIера Къуранах кхардар гайти цара. Цу зуламечу гIулкхана доьхьало йан арабевлла болу нах дIа а луьйцуш, Къуран сийсаздан гIертарг ларво Швецин полицино. Делан мостагIаша шайн бакъйолу йуьхь ма-йарра гучу а йаьккхина, Бусулба динан дуьхьала тIом бар магийна. Иштта йу Малхбузенан пачхьалкхийн идеологи. Церан политика талхарна, сийсазло йаржорна тIейоьгIна йу. 

«Цу хиламо даррехь гойту бакъо мичахь йу: цхьана агIор Ислам-дин сийсаздарехь йолу акцеш магош йолу Малхбузе йу, ткъа вайн Пачхьалкхехь – динан, оьздангаллин, доьзалан мехаллаш Iедалан тIегIанехь Iалашъйеш йу. Ткъа Сийлахь Къуранан а, Пайхамаран (с.I.в.) сийна тIекховдинчунна таIзар деш ду», - йаздо Межиев Салахьа. 

Иштта Межиевс билгалдаьккхира Россис ишттачу зуламхошна доьхьало йеш Украинехь дIахьош болх хилар а. 

«Иблисан гIоьнчаша лелочуьнан доза дац. Уьш хIаллак хилан йиссинарг дукха хан йац, Дала царна дуьненахь а, эхартахь а тaIзар дийриг хиларх шеко йац. Цара муьлхха некъ лелорах, Далла, йа Бусалба динан йан новкъарло а йац. Дала шайна йеллачу цхьана заманна беш болх бу цара иза. ГIазотехь болчу вайн вежарийн Дала аьтто бойла динан мостагIашкара толам баккхарехь»,- тIетуьйхира цо.

При копировании материалов ссылка на сайт обязательна