Нохчийн Республикин Мехк-Ден Кадыров Рамзанан указаца 2009-чу шарахь дуьйна вайн махкахь билгалдина даздар ду Нохчийн зудчун де. Цуьнца доьзна хаамийн «Чеченская Республика сегодня» агентствон корреспондентаца хиллачу интервьюхь НР-н йукъараллин палатин председателан гIоьнчас Бичалов Салавдис дийцира даздарах лаьцна. 

"Нохчийн зудчун де вайн махкахь билгалдаьккхина хилар мехала совгIат ду. Вайн Мехк-Ден Указаца товбецан (сентябрь) беттан кхоалгӀачу кӀирандийнахь даздеш ду иза. Тахана тидам бича, вайн республикин Iедалан хIора а декъехь къахьоьгуш бу зударий – правительствехь, парламентехь, Iилма Iаморан институташкахь иштта дIа кхин а. Къаьсттина мехала ду цара нохчийн зудчун уггаре мехала долу гIиллакх-гIуллакх лелош а, вайн къоман Iадаташ лардеш а, шаьш долчу меттехь гойтуш а хилар. 

Даима а хала киртиг хилла нохчийн зудчунна тIехь – къаьсттина вайн махкахь бохаме муьраш баьхкинчу хенахь гайтина цара шайн доьналла. Таханалерачу дийнахь а йохк-эцарехь а, Iедалан балхахь а къахьоьгуш бу уьш. Доккха беркат ду тахана вайн мехкан хIора йуьртахь Iер-дахаран хьелаш хилар: уьш ца хиларца йоьзна йолу хало уггаре хьалха зударшна кхочуш йара. Тахана хаза зама хIоьттина вайна, къам паргIат дехаш ду, зударшна а массо хIуманна тIехь паргIато йу, царна йогIуш а йара и паргIато. 

ТIекхочуш долчу дезачу денца даггара декъалйан луур дара хIора зуда! Лаьа шу шайн доьзалех даккхийдеш, халахетаро бIаьрг ца белхош, ирсе дехийла! Дала дукха дахадойла шу",- элира Салавдис.


При копировании материалов ссылка на сайт обязательна